布偉傑（阿一），憑「御用鬼佬」形象深入民心，日前宣佈結束在港生活30年，移居日本福岡，以創業簽證擔任英文導師，並帶走三隻愛貓。他1995年來港，稱在香港的年期數超過美國，已視自己為「香港人」。
日前他舉辦一人棟篤音樂劇《阿一·點止鬼佬咁簡單2 - 植根》，台上真情流露、聲淚俱下，剖白婚姻破裂同誤墮傳銷欠巨債。
六年情斷，搬足五次屋
阿一在台上剖白同第二任化妝師太太Celia的破裂婚姻。他2018年離巢，翌年生活劇變，網補工作告吹，太太寧隔離21日都北上開工，兩人結婚6年搬足5次。他嘆：「越搬越細，我每次都講『唔緊要，等我儲多一、兩年會買屋住』，我每次都真心，但每次講完，説服力都差咗啲。」最終由女方提做回朋友，兩人簽字當天仍約飯睇戲，前妻至今幫手照貓。
2023誤墮傳銷，高利貸近百萬
除婚姻亮紅燈，阿一自揭2023年受人生重創：被「包裝精美的謊言」騙入傳銷公司亮碧思，更向高利貸借近七位數（近百萬港元）。生意泡湯後遭收數佬在村口大叫追債，個人證件被放上網，夜間嚴重失眠，一度陷「死局」，自感生命受威脅；所幸犯法者其後被捕，事件平息。
30年3部電影，赴日再試三十年
離巢TVB原想闖影壇，他慨嘆市道低迷，近5年僅接拍3部電影。問到赴日有冇設限，他笑言「或再試三十年」，引用劇中對白：「下一步係點，我點知啫？」
阿一在劇中話：「呢30年，香港教識我點樣快、點樣頂壓力、點樣執生」；他笑言福岡返港僅3小時航程，「好多人去咗大灣區生活，我就去福岡生活，有時可以返嚟香港做嘢。」
比卡超精靈訓練員。 — 小智
